ᠲᠦᠷᠪᠡᠨ ᠴᠠᠭ ᠢ ᠰᠤᠳᠤᠷ ᠪᠤᠯᠳᠠᠯᠠ᠂ ᠲᠠᠯᠠ ᠬᠠᠩᠭᠠᠢ ᠪᠠᠨ ᠲᠡᠦᠬᠡ ᠪᠤᠯᠳᠠᠯᠠ ᠵᠢᠳᠬᠦᠨ ᠲᠡᠮᠡᠦᠯᠵᠦ ᠢᠷᠡᠭᠰᠡᠨ ᠬᠠᠰᠠᠭ ᠲᠡᠷᠭᠡ ᠮᠢᠨᠤ᠃ ᠨᠢᠭᠡ ᠬᠦᠷᠳᠦ ᠨᠢ | ᠨᠠᠷᠠᠨ ᠤ ᠭᠡᠷᠡᠯ᠂ ᠨᠦᠭᠦᠭᠡ ᠬᠦᠷᠳᠦ ᠨᠢ ᠰᠠᠷᠠᠨ ᠤ ᠲᠤᠶᠠᠭᠠ ᠭᠡᠵᠦ ᠲᠥᠰᠥᠭᠡᠯᠡᠨ ᠪᠤᠳᠤᠬᠤ ᠳᠤ ᠣᠨ ᠵᠠᠭᠤᠨ ᠤ ᠲᠡᠷᠲᠡᠭᠡ ᠠᠴᠠ ︽ᠣᠷᠣᠰᠢᠬᠤᠢ︾ ᠬᠡᠮᠡᠬᠦ ᠨᠢᠭᠡᠨ | ᠠᠮᠢᠳᠤᠷᠠᠯ ᠤᠨ ᠲᠣᠮᠢᠶᠠ ᠶᠢ ᠡᠬᠡ ᠭᠠᠵᠠᠷ ᠤᠨ ᠬᠥᠷᠥᠰᠥᠨ ᠳᠡᠭᠡᠷᠡ ᠪᠦᠲᠦᠨ ᠲᠡᠷᠭᠡᠯ ᠠᠮᠢᠯᠠᠲᠠᠯᠠ ᠵᠢᠷᠤᠵᠤ᠂ ᠬᠥᠮᠥᠨ ᠵᠤᠨ ᠤ ᠥᠭᠰᠥᠵᠦ ᠥᠭᠡᠳᠡᠯᠡᠬᠦ ᠶᠢᠨ ᠭᠡᠭᠡᠨ | ᠰᠠᠷᠠᠭᠤᠯ ᠵᠠᠮ ᠢ ᠨᠡᠭᠡᠭᠡᠭᠰᠡᠨ ᠪᠠᠶᠢᠵᠤ ᠳ᠋ᠠ︕ | ᠬᠤᠯᠠ ᠳᠠᠭᠠᠨ ᠮᠥᠭᠡᠷᠡᠯᠳᠦᠬᠦ ᠦᠬᠡᠷ ᠤᠨ ᠰᠦᠷᠦᠭ ᠢ ᠬᠠᠷᠠᠬᠤ ᠳᠤ ᠬᠠᠰᠠᠭ ᠢᠶᠠᠨ ᠴᠢᠷᠦᠭᠰᠡᠨ ᠠᠷᠠᠯ ᠤᠨ ᠱᠠᠷ ᠤᠨ ᠴᠢᠨᠢ ᠰᠡᠷᠡᠶᠢᠭᠰᠡᠨ ᠬᠤᠶᠠᠷ | ᠡᠪᠡᠷ ᠢᠶᠠᠷ ᠢᠶᠠᠨ ᠲᠡᠭᠷᠢ ᠳᠡᠭᠡᠷᠡ ᠲᠠᠲᠠᠯᠠᠭᠰᠠᠨ ᠦᠰᠦᠭ ᠤᠳ ᠨᠢ ᠰᠥᠨᠢ ᠶᠢᠨ ᠬᠠᠷᠠᠩᠭᠤᠢ ᠳᠤ ᠣᠴᠢᠯᠠᠨ ᠲᠦᠭᠡᠭᠰᠡᠨ ᠤᠳᠤᠨ ᠮᠡᠴᠢᠳ ᠪᠣᠯᠵᠤ ᠬᠠᠷᠠᠭᠠᠨ ᠳᠤ | ᠡᠷᠬᠡᠯᠡᠨ ᠲᠣᠷᠮᠣᠯᠵᠠᠨᠠ᠃ | ᠪᠥᠮᠪᠥᠷᠴᠡᠭ ᠢᠶᠠᠨ ᠭᠡᠰᠡᠨ ᠪᠦᠯᠢᠶᠡᠨ ᠳᠤᠯᠠᠭᠠᠨ ᠬᠠᠶᠢᠷᠠ ᠴᠢ ᠪᠠᠶᠢᠵᠠᠢ᠃ ᠪᠦᠭᠦᠳᠡᠭᠡᠷ ᠢᠶᠠᠨ ᠡᠷᠬᠡ ᠲᠡᠭᠰᠢ ᠣᠷᠣᠰᠢᠬᠤ ᠶᠢ ᠬᠦᠰᠡᠨ ᠡᠷᠡᠮᠡᠯᠵᠡᠯᠡᠭᠰᠡᠨ | ᠪᠣᠰᠤᠭᠠ ᠢᠲᠡᠭᠡᠯ ᠴᠦ ᠴᠢ ᠪᠠᠶᠢᠵᠠᠢ᠃ ᠡᠩᠬᠡ ᠲᠠᠶᠢᠪᠤᠩ᠂ ᠡᠶᠡ ᠨᠠᠶᠢᠷᠰᠠᠭ ᠢ ᠮᠥᠩᠬᠡᠯᠡᠬᠦ ᠭᠡᠵᠦ ᠳᠣᠷᠣᠨᠠᠲᠤ ᠥᠨᠳᠦᠷᠯᠢᠭ ᠤᠨ ᠰᠡᠭᠡᠷ ᠨᠢᠷᠤᠭᠤᠨ ᠠᠴᠠ ᠬᠠᠩᠭᠢᠷ | ᠴᠢᠩᠭᠢᠷ ᠰᠠᠵᠢᠯᠠᠭᠰᠠᠭᠠᠷ ᠳᠡᠯᠡᠬᠡᠢ ᠵᠦᠭ ᠭᠡᠷᠡᠯ ᠪᠣᠯᠵᠤ ᠤᠷᠤᠰᠤᠭᠰᠠᠨ ᠠ᠋ ᠴᠢ᠃ ᠲᠠᠯᠠ ᠶᠢᠨ ᠲᠡᠨᠵᠢᠨ ᠠᠴᠠ ᠨᠤᠮᠤᠯᠵᠠᠨ ᠲᠠᠲᠠᠭᠰᠠᠨ ᠲᠤᠯᠤᠭᠠᠨ ᠥᠩᠭᠡ ᠶᠢᠨ | ᠰᠣᠯᠣᠩᠭᠠ ᠪᠣᠯᠵᠤ ᠰᠠᠴᠤᠷᠠᠭᠰᠠᠨ ᠠ᠋ ᠴᠢ︕ | ᠲᠠᠮ ᠶᠠᠰᠢᠩ᠂ ᠲᠦᠷᠪᠡᠨ ᠭᠤᠳᠣᠢ᠂ ᠢᠯᠠᠤ ᠁ ᠲᠡᠷᠡ ᠪᠦᠭᠦᠨ ᠲᠡᠭᠷᠢ ᠶᠢᠨ ᠵᠦᠢ᠂ ᠭᠠᠵᠠᠷ ᠤᠨ ᠵᠢᠷᠤᠬᠠᠢ ᠳᠤ ᠵᠣᠬᠢᠴᠠᠭᠤᠯᠵᠤ ᠡᠭᠦᠳᠦᠨ ᠪᠦᠲᠦᠭᠡᠭᠰᠡᠨ ᠡᠪᠦᠭᠡ | ᠳᠡᠭᠡᠳᠦᠰ ᠤᠨ ᠮᠠᠨᠢ ᠰᠡᠳᠬᠢᠬᠦᠢ ᠶᠢᠨ ᠠᠭᠤᠳᠠᠮ ᠵᠠᠢ᠂ ᠰᠡᠳᠬᠢᠯ ᠤᠨ ᠭᠦᠨ ᠪᠠᠭᠲᠠᠭᠠᠮᠵᠢ᠂ ᠠᠮᠢᠳᠤᠷᠠᠯ ᠤᠨ ᠯᠣᠭᠢᠭ᠂ ᠠᠯᠤᠰ ᠤᠨ ᠪᠤᠳᠤᠯ ᠢ ᠪᠢᠰᠢᠷᠡᠬᠦ ᠦᠭᠡᠢ | ᠪᠠᠶᠢᠬᠤ ᠶᠢᠨ ᠠᠷᠭᠠ ᠦᠭᠡᠢ᠃ | ᠨᠠᠷᠠᠨ ᠨᠡᠭᠦᠳᠡᠯ ᠲᠠᠢ ᠮᠠᠯᠴᠢᠨ ᠠᠷᠠᠳ ᠢ ᠮᠢᠨᠢ᠂ ᠭᠡᠷ ᠡᠷᠦᠭᠡ ᠲᠠᠢ ᠨᠢ ᠲᠡᠭᠡᠭᠡᠵᠦ ᠠᠯᠤᠰ ᠤᠨ ᠠᠶᠠᠨ ᠢ ᠲᠤᠭᠤᠯᠵᠦ ᠢᠷᠡᠭᠰᠡᠨ ᠤᠵᠠᠭᠤᠷ | ᠴᠠᠭ ᠤᠨ︽ᠨᠢᠰᠬᠡᠯ︾᠃ ᠬᠠᠩᠭᠢᠷ ᠲᠠᠩᠭᠢᠷ ᠲᠠᠭᠤᠨ ᠢᠶᠠᠷ ᠢᠶᠠᠨ ᠬᠠᠩᠭᠠᠢ ᠭᠤᠪᠢ ᠶᠢ ᠰᠡᠷᠡᠭᠡᠵᠦ᠂ ᠬᠡᠭᠡᠷᠡ ᠶᠢᠨ ᠰᠠᠯᠬᠢᠨ ᠲᠠᠢ ᠲᠣᠭᠯᠠᠵᠤ ᠶᠠᠪᠤᠭᠰᠠᠨ ︽ᠲᠤᠤᠯᠢ︾᠃ | ᠬᠡᠦᠬᠡᠳ ᠤᠨ ᠬᠠᠷᠠᠭᠠ ᠲᠡᠯᠡᠵᠦ᠂ ᠤᠬᠠᠭᠠᠨ ᠢ ᠰᠣᠷᠢᠭᠠᠳ ᠨᠤᠲᠤᠭ ᠲᠠᠨᠢᠭᠤᠯᠤᠭᠰᠠᠨ︽ᠲᠤᠮᠤᠭ︾ ᠠ᠋︕ | ᠮᠥᠷᠥᠭᠡᠳᠦᠯ ᠳᠤ ᠴᠢ ᠮᠢᠨᠢ ᠮᠥᠩᠬᠡᠷᠡᠨᠡ᠃ ᠮᠥᠭᠡᠷᠡᠵᠦ ᠵᠢᠳᠬᠦᠭᠰᠡᠨ ᠦᠬᠡᠷ ᠤᠨ ᠴᠢᠨᠢ ᠮᠥᠷ ᠨᠢ ᠭᠦᠷᠳᠡᠯᠠ ᠲᠠᠮᠠᠭᠠ ᠰᠢᠭ᠋ ᠳᠤᠷᠠᠶᠢᠭᠠᠳ ᠭᠡᠷᠡᠯ | ᠲᠤᠰᠬᠤ ᠪᠠᠷ ᠰᠢᠵᠢᠷᠲᠦᠨ ᠲᠤᠶᠠᠭᠠᠷᠠᠨᠠ᠃ ᠣᠨ ᠵᠢᠯ ᠤᠨ ᠰᠠᠯᠬᠢ ᠪᠣᠷᠣᠭᠠᠨ᠂ ᠬᠠᠯᠠᠭᠤᠨ ᠬᠦᠢᠲᠡᠨ ᠢ ᠠᠵᠢᠭ ᠦᠭᠡᠢ ᠲᠤᠭᠤᠯᠤᠬᠰᠠᠨ ᠴᠢᠨᠦ ᠦᠯᠢᠭᠡᠷ ᠢ ᠪᠢ | ᠬᠡᠵᠢᠶᠡᠳᠡ ᠶᠠᠷᠢᠭᠠᠳ ᠪᠠᠷᠠᠬᠤ ᠦᠭᠡᠢ᠃ ᠰᠡᠭᠦᠳᠡᠷ ᠳᠣᠣᠷᠠ ᠴᠢᠨᠢ ᠰᠡᠷᠢᠭᠦᠴᠡᠵᠦ ᠬᠡᠪᠲᠡᠭᠰᠡᠨ︽ᠭᠤᠷᠪᠠᠨ ᠮᠠᠷᠠᠯ︾ ᠤᠨ ᠭᠡᠷᠡᠯ ᠲᠠᠢ ᠨᠢᠳᠦ ᠴᠢᠮᠠ ᠠᠴᠠ ᠰᠠᠯᠬᠤ ᠦᠭᠡᠢ᠃ | ᠰᠡᠷᠢᠭᠦᠨ ᠭᠤᠪᠢ ᠶᠢᠨ ᠰᠡᠪᠡᠯᠵᠡᠭᠦᠷ ᠰᠠᠯᠬᠢ ᠴᠦ ᠴᠢᠮᠠᠶᠢ ᠮᠠᠷᠲᠠᠬᠤ ᠦᠭᠡᠢ᠃ ᠬᠠᠰᠠᠭ ᠲᠡᠷᠭᠡ ᠮᠢᠨᠢ ᠠ᠋︕ | ᠬᠤᠯᠠ ᠶᠢᠨ ᠬᠦᠰᠡᠯ ᠴᠢᠨᠢ ᠬᠠᠪᠤᠷ ᠢ ᠤᠭᠲᠤᠨ ᠴᠡᠴᠡᠭ ᠪᠣᠯᠵᠤ ᠬᠠᠩᠬᠤᠯᠲᠠᠯᠠ ᠳᠡᠯᠭᠡᠷᠡᠭᠡ ᠴᠦ ᠶᠤᠮ ᠤᠤ︖ ᠬᠤᠶᠠᠷ ᠬᠦᠷᠳᠦᠨ ᠤ ᠴᠢᠨᠢ ᠳᠠᠷᠤᠭᠰᠠᠨ | ᠤᠷᠤᠮ ᠠᠴᠠ ᠴᠠᠬᠢᠯᠳᠠᠭ ᠳᠡᠯᠭᠡᠷᠡᠨᠡ᠃ ᠰᠣᠷᠭᠤᠭ ᠦᠨᠦᠷ ᠢ ᠨᠢ ᠠᠮᠲᠠᠯᠠᠬᠤ ᠳᠤ ᠢᠷᠠᠭᠤ ᠨᠠᠶᠢᠷᠠᠭ ᠰᠢᠭ᠋ ᠠᠮᠲᠠᠲᠠᠢ᠃ ᠰᠢᠳᠤᠷᠭᠤ ᠶᠣᠰᠣᠨ ᠢ ᠬᠠᠶᠢᠭᠰᠠᠨ ᠰᠠᠨᠠᠭᠠ | ᠪᠤᠳᠤᠯ ᠴᠢᠨᠢ ᠡᠷᠬᠢᠮ ᠬᠡᠭᠡᠮᠰᠦᠭ ᠤᠨ ᠲᠤᠶᠢᠯ ᠠ᠋᠃ ᠴᠢᠮᠠᠶᠢ ᠰᠠᠨᠠᠵᠤ ᠦᠭᠡᠶᠢᠯᠡᠬᠦ ᠲᠤᠳᠤᠮ ᠤᠳᠤ ᠴᠠᠭ ᠤᠨ ᠭᠠᠯᠲᠤ ᠲᠡᠷᠭᠡ᠂ ᠮᠠᠰᠢᠨ ᠲᠡᠷᠭᠡ᠂ ᠨᠢᠰᠬᠡᠯ ᠁ ᠴᠢᠨᠦ | ᠠᠯᠳᠠᠨ ᠬᠡᠪᠡᠯᠢ ᠠᠴᠠ ᠲᠠᠰᠤᠷᠠᠬᠰᠠᠨ ᠦᠷᠡ ᠰᠠᠳᠤᠨ ᠭᠡᠮᠡᠷ ᠪᠤᠳᠤᠬᠳᠠᠬᠤ ᠶᠢ ᠴᠣᠬᠤᠮ ᠶᠠᠭᠤ ᠭᠡᠬᠦ ᠪᠤᠢ︖ ᠲᠡᠷᠡ ᠪᠦᠭᠦᠨ ᠴᠢᠮᠠ ᠠᠴᠠ ᠰᠡᠳᠡᠯᠲᠡ ᠣᠯᠣᠭᠰᠠᠨ | ᠦᠭᠡᠢ ᠭᠡᠵᠦ ᠤᠤ⁈ | ᠠᠷᠤ ᠭᠤᠣᠯ ᠤᠨ ᠤᠰᠤ ᠪᠠᠨ ᠲᠡᠭᠡᠭᠡᠵᠦ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠡᠮᠡᠭᠡ ᠮᠢᠨᠢ᠂ ᠬᠠᠰᠠᠭ ᠲᠡᠷᠭᠡ᠂ ᠬᠠᠷᠠ ᠦᠬᠡᠷ ᠬᠤᠶᠠᠷ ᠲᠠᠭᠠᠨ ᠡᠭᠡᠯᠢᠲᠡᠢ ᠭᠡᠳᠡᠭ ᠨᠢ | ᠠᠷᠭᠠ ᠦᠭᠡᠢ᠃ ᠶᠡᠷᠡᠨ ᠨᠠᠢᠮᠠᠨ ᠨᠠᠰᠤᠯᠠᠲᠠᠯᠠ ᠬᠠᠮᠲᠤ ᠥᠭᠰᠥᠵᠦ ᠤᠷᠤᠭᠤᠳᠠᠵᠤ ᠶᠠᠪᠤᠬᠤ ᠳᠠᠭᠠᠨ ᠳᠠᠩᠳᠠ ᠭᠦᠨ ᠵᠤᠵᠠᠭᠠᠨ ᠬᠠᠶᠢᠷᠠ ᠰᠡᠳᠬᠢᠯᠭᠡ ᠲᠠᠢ | ᠪᠣᠯᠴᠢᠬᠠᠭᠰᠠᠨ ᠪᠢᠵᠡ︖ ᠥᠭᠡᠳᠡ ᠪᠤᠯᠬᠤ ᠠᠴᠠ ᠪᠠᠨ ᠡᠮᠦᠨᠡ ᠠᠪᠤ ᠶᠢ ᠳᠡᠷᠭᠡᠳᠡ ᠪᠠᠨ ᠳᠠᠭᠤᠳᠠᠵᠤ ︽ᠡᠷᠯᠢᠭ ᠲᠠᠮᠤ ᠶᠢᠨ ᠣᠷᠳᠣᠨ ᠢ ᠦᠨᠡᠨ ᠤ ᠭᠠᠵᠠᠷ ᠭᠡᠳᠡᠭ᠃ | ᠬᠠᠷᠠ ᠦᠬᠡᠷ ᠬᠢᠭᠡᠳ ᠬᠠᠰᠠᠭ ᠲᠡᠷᠭᠡ ᠪᠠᠨ ᠠᠪᠴᠤ ᠭᠦᠷᠦᠭᠡᠳ ᠭᠠᠪᠢᠶᠠ ᠵᠢᠳᠬᠦᠯ ᠢ ᠨᠢ ᠲᠡᠮᠳᠡᠭᠯᠡᠭᠦᠯᠦᠶᠡ︾ ᠭᠡᠪᠡ᠃ ᠠᠪᠤ ᠠᠷᠭᠠ ᠪᠠᠨ ᠪᠠᠷᠠᠬᠤ ᠳᠠᠭᠠᠨ | ᠲᠤᠬᠤ ᠪᠠᠨ ᠮᠠᠭᠠᠵᠢᠭᠰᠠᠨ ᠭᠡᠳᠡᠭ᠃ ᠭᠡᠲᠡᠯᠡ ᠤᠨᠲᠠᠨ ᠬᠡᠪᠲᠡᠨ ᠪᠤᠳᠤᠬᠰᠠᠭᠠᠷ ᠪᠠᠶᠢᠵᠤ ᠪᠠᠷᠠᠭᠤᠨ ᠠᠶᠢᠯ ᠤᠨ ᠨᠡᠷᠡᠳᠦ ᠮᠣᠳᠣᠨ ᠲᠠᠷᠬᠠᠨ ᠨᠠᠮᠵᠢᠯ ᠡᠪᠦᠭᠡ ᠶᠢ ᠰᠠᠨᠠᠵᠤ | ᠣᠯᠣᠭᠠᠳ ᠲᠡᠭᠦᠨ ᠢᠶᠠᠷ ᠬᠠᠷᠮᠠᠯᠠᠵᠤ ᠪᠠᠭᠲᠠᠮᠠᠷ ᠬᠠᠰᠠᠭ ᠲᠡᠷᠭᠡ ᠶᠢᠨ ᠵᠠᠭᠪᠤᠷ ᠬᠢᠭᠡᠳ ᠬᠠᠷᠠ ᠦᠬᠡᠷ ᠲᠠᠢ ᠨᠢ ᠵᠣᠬᠢᠶᠠᠯᠭᠠᠵᠤ ᠰᠢᠷᠳᠡᠵᠦ ᠪᠤᠳᠤᠭᠠᠳ ᠬᠠᠨᠴᠤᠢ | ᠳᠤᠨᠢ ᠬᠢᠵᠦ ᠶᠠᠪᠤᠭᠤᠯᠤᠭᠰᠠᠨ ᠲᠤᠬᠠᠢ ᠡᠵᠢ ᠦᠷᠭᠦᠯᠵᠢ ᠶᠠᠷᠢᠳᠠᠭ ᠪᠠᠶᠢᠵᠠᠢ᠃ | ᠣᠶᠢᠷᠠ ᠳᠤ ᠪᠢ ᠬᠠᠰᠢᠶᠠᠨ ᠳᠤ ᠪᠠᠶᠢᠭᠠ ᠬᠠᠰᠠᠭ ᠲᠡᠷᠭᠡ ᠪᠠᠨ ᠬᠠᠷᠠᠬᠤ ᠪᠦᠷᠢ ᠡᠮᠡᠭᠡ ᠮᠢᠨᠢ᠂ ᠬᠠᠷᠠ ᠦᠬᠡᠷ ᠢᠶᠠᠨ ᠬᠥᠯᠥᠭᠡᠳ ᠠᠷᠤ ᠭᠤᠣᠯ ᠤᠨ | ᠤᠰᠤᠨ ᠳᠠᠭᠠᠨ ᠶᠠᠪᠤᠬᠤ ᠰᠢᠭ᠋ ᠬᠠᠷᠠᠭᠠᠨ ᠳᠤ ᠮᠢᠨᠢ ᠪᠥᠷᠲᠥᠯᠵᠡᠨᠡ᠃ ︽ᠬᠠᠶᠠ ᠨᠢᠭᠡ ᠰᠥᠨᠢ ᠠᠷᠤ ᠭᠤᠣᠯ ᠠᠴᠠ ᠤᠰᠤ ᠪᠠᠨ ᠲᠡᠭᠡᠭᠡᠴᠢᠭᠡᠳ ᠡᠮᠡᠭᠡ ᠮᠢᠨᠢ ᠬᠠᠷᠠ | ᠦᠬᠡᠷ ᠢᠶᠠᠨ ᠬᠥᠲᠥᠯᠵᠦ ︿ᠨᠤᠭᠤᠨᠵᠠᠶᠠᠭᠠ﹀ ᠶᠢ ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠯᠠᠭᠰᠠᠭᠠᠷ ᠭᠡᠷ ᠵᠦᠭ ᠢᠶᠠᠨ ᠢᠷᠡᠨᠡ︾ ᠬᠡᠮᠡᠨ ᠵᠡᠭᠦᠳᠦᠯᠡᠭᠡᠳ ᠰᠡᠷᠡᠬᠦ ᠳᠤ ᠦᠷ ᠬᠠᠶᠠᠭᠠᠷᠠᠳᠠᠭ | ᠪᠠᠶᠢᠯᠠ ᠁ | ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠦᠶᠡ ᠠᠴᠠ ᠠᠶᠠᠨ ᠤ ᠬᠠᠨᠢ᠂ ᠠᠮᠢᠳᠤᠷᠠᠯ ᠤᠨ ᠬᠢᠨᠢ ᠲᠦᠰᠢᠭ ᠪᠣᠯᠵᠤ ᠥᠪᠡᠷ ᠤᠨ ᠭᠡᠬᠦ ᠬᠡᠷᠡᠯᠳᠦ ᠲᠡᠦᠬᠡ ᠪᠠᠨ ᠪᠦᠲᠦᠭᠡᠵᠦ | ᠢᠷᠡᠭᠰᠡᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠳᠡᠯᠡᠬᠡᠢ ᠪᠠᠨ ᠬᠡᠮᠡᠬᠦ ᠥᠭᠭᠢᠶᠡᠮᠦᠷ ᠬᠠᠶᠢᠷᠠ ᠳᠠᠭᠠᠨ ᠳᠦᠷᠡᠯᠵᠡᠵᠦ᠂ ᠡᠩᠬᠡ ᠲᠠᠶᠢᠪᠤᠩ ᠢ ᠰᠢᠳᠦᠨ ᠡᠷᠬᠡ ᠴᠢᠯᠦᠭᠡᠨ ᠤ ᠲᠥᠯᠥᠭᠡ | ᠰᠦᠷᠳᠡᠭᠦᠯᠦᠯ ᠪᠤᠶᠤ ᠳᠣᠷᠣᠮᠵᠢᠯᠠᠯ᠂ ᠬᠠᠭᠠᠴᠠᠯ ᠬᠢᠭᠡᠳ ᠳᠣᠷᠣᠶᠢᠲᠠᠯ᠂ ᠤᠯᠠᠩᠭᠠᠰᠤᠭᠰᠠᠨ ᠲᠠᠶᠢᠨ ᠤ ᠥᠭᠡᠳᠡ ᠠᠴᠠ ᠲᠠᠭᠠᠷᠢᠵᠦ ᠶᠠᠪᠤᠭᠰᠠᠨ ᠢᠯᠠᠯᠲᠠ ᠶᠢᠨ ︽ᠲᠠᠩᠺ︾ | ᠴᠦ ᠴᠢ ᠶᠤᠮ ᠳ᠋ᠠ ᠬᠠᠰᠠᠭ ᠮᠢᠨᠢ ᠠ᠋︕ ᠳᠦᠩᠭᠡᠷ᠂ ᠲᠠᠩᠭᠠᠷ ᠴᠢᠨᠦ ᠲᠠᠭᠤᠨ ᠡᠸᠦ᠋ᠷᠦᠫᠡ ᠶᠢᠨ ᠲᠡᠭᠷᠢ ᠳᠤ ᠬᠦᠩᠭᠢᠨᠡᠨ ᠳᠠᠭᠤᠷᠢᠰᠴᠤ᠂ ᠬᠥᠷᠥᠰᠥᠨ ᠳᠤ | ᠳᠤᠷᠠᠶᠢᠭᠰᠠᠨ ᠮᠥᠷ ᠴᠢᠨᠢ ᠪᠠᠯᠠᠷᠠᠰᠢ ᠦᠭᠡᠢ ᠭᠡᠷᠡᠯᠳᠦᠭᠰᠡᠭᠡᠷ ᠠ᠋︕ | ᠡᠳᠦᠷ ᠰᠥᠨᠢ ᠡᠭᠡᠯᠵᠢᠯᠡᠨ᠂ ᠣᠨ ᠵᠢᠯ ᠥᠭᠰᠥᠨ ᠪᠤᠭᠤᠷᠤᠯᠲᠤᠭᠰᠠᠨ ᠴᠦ ᠬᠤᠶᠠᠷ ᠬᠦᠷᠳᠦ ᠪᠠᠷ ᠢᠶᠠᠨ ᠳᠡᠯᠡᠬᠡᠢ ᠶᠢ ᠨᠢᠭᠡ ᠳᠣᠮᠨᠣᠵᠤ᠂ ᠳᠣᠷᠣᠨᠠᠲᠤ | ᠠᠽᠢᠶᠠ ᠶᠢᠨ ᠠᠯᠳᠠᠷ ᠢ ᠡᠷᠭᠦᠭᠰᠡᠨ ᠴᠢᠨᠦ ᠭᠠᠪᠢᠶᠠ ᠵᠢᠳᠬᠦᠯ᠂ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠤ ᠵᠢᠷᠦᠬᠡᠨ ᠲᠣᠯᠲᠣ ᠳᠤ ᠬᠠᠳᠠᠩᠰᠢᠵᠤ᠂ ᠴᠠᠭ ᠡᠷᠢᠨ ᠤ ᠬᠥᠭᠵᠢᠯᠲᠡ ᠳᠤ | ᠠᠬᠢᠭᠤᠯᠬᠤ ᠦᠢᠯᠡᠳᠦᠯ ᠦᠵᠡᠭᠦᠯᠦᠭᠰᠡᠭᠡᠷ᠃ | ᠬᠠᠰᠠᠭ ᠮᠢᠨᠤ᠂ ᠬᠥᠭᠵᠢᠯ ᠮᠠᠨᠳᠤᠯ ᠤᠨ ᠬᠤᠷᠤᠢ ᠮᠢᠨᠤ᠃ ᠪᠠᠯᠠᠷ ᠬᠤᠴᠤᠷᠤᠩᠭᠤᠢ ᠴᠠᠭ ᠦᠶᠡ ᠶᠢ ᠭᠡᠶᠢᠭᠦᠯᠵᠦ ᠰᠢᠨᠡ ᠡᠷᠢᠨ ᠢ ᠤᠭᠲᠤᠭᠰᠠᠨ ᠤᠶᠤᠨ | ᠪᠢᠯᠢᠭ ᠤᠨ ᠭᠡᠭᠡ ᠮᠢᠨᠤ᠃ ᠤᠳᠤ ᠴᠢ ᠮᠢᠨᠢ ᠲᠡᠦᠬᠡ ᠪᠣᠯᠵᠤ ᠮᠦᠽᠧᠢ ᠠᠴᠠ ᠰᠠᠴᠤᠷᠠᠨ ᠲᠤᠶᠠᠭᠠᠷᠠᠬᠤ ᠳᠠᠭᠠᠨ ᠲᠦᠮᠡᠨ ᠤ ᠰᠡᠳᠬᠢᠯ ᠢ ᠭᠡᠶᠢᠭᠦᠯᠦᠭᠰᠡᠭᠡᠷ ᠠ᠋︕ | ᠮᠥᠷᠥᠭᠡᠳᠦᠯ ᠳᠤ ᠮᠥᠩᠬᠡᠷᠡᠬᠦ ᠬᠠᠰᠠᠭ ᠮᠢᠨᠢ︕ ᠮᠥᠩᠬᠡ ᠲᠡᠭᠷᠢ ᠶᠢᠨ ᠢᠪᠡᠭᠡᠯ ᠰᠣᠶᠣᠷᠬᠠᠭᠰᠠᠨ ᠲᠡᠷᠭᠡ ᠮᠢᠨᠢ ᠠ᠋⁈ |