| ᠮᠢᠩᠭᠠᠨ ᠭᠠᠵᠠᠷ ᠤᠨ ᠠᠯᠤᠰ ᠠᠴᠠ ᠬᠠᠪᠤᠷ ᠤᠨ ᠤᠷᠢ ᠨᠠᠭᠠᠰᠢᠯᠠᠵᠤ | ᠮᠥᠷᠥᠭᠡᠳᠦᠯ ᠰᠡᠷᠡᠯᠵᠡᠵᠦ ᠤᠰᠤᠨ ᠤ ᠠᠶᠠᠯᠭᠤ ᠶᠢ ᠬᠥᠭᠵᠢᠮᠳᠡᠨᠡ | ᠮᠠᠨᠠᠨᠲᠤ ᠬᠥᠬᠡ ᠠᠭᠤᠯᠠᠰ ᠳᠡᠭᠡᠳᠦᠰ ᠤᠨ ᠰᠦᠷ ᠢ ᠡᠷᠭᠦᠵᠦ | ᠲᠤᠮᠤᠭ ᠠᠯᠤᠰᠷᠠᠵᠤ ᠰᠠᠯᠬᠢᠨ ᠤ ᠬᠥᠯ ᠢ ᠲᠤᠱᠠᠨᠠ | | ᠮᠥᠷᠥᠭᠡᠳᠦᠯ ᠵᠠᠭᠤᠭᠰᠠᠨ ᠵᠠᠭᠤᠨ ᠤ ᠮᠢᠩᠭᠠᠨ ᠮᠢᠩᠭᠠᠨ ᠰᠢᠪᠠᠭᠤᠳ | ᠢᠷᠭᠠᠯ ᠬᠠᠳᠠᠨ ᠤ ᠰᠡᠵᠢᠭᠦᠷ ᠲᠤ ᠡᠭᠦᠷ ᠢᠶᠠᠨ ᠵᠠᠰᠠᠵᠤ ᠳᠣᠩᠭᠤᠳᠤᠨᠠ | ᠮᠥᠩᠬᠡᠷᠡᠯ ᠤᠨ ᠭᠤᠸᠠ ᠡᠭᠡᠰᠢᠭ ᠢ ᠦᠨᠳᠦᠰᠦ ᠨᠠᠮᠠᠭᠠᠤᠨ ᠳᠠᠭᠤᠯᠠᠵᠤ | ᠮᠥᠴᠢᠷ ᠢᠶᠠᠨ ᠳᠡᠯᠭᠡᠭᠰᠡᠨ ᠰᠢᠭᠤᠶᠢᠳ ᠰᠠᠯᠬᠢ ᠰᠥᠷᠦᠨ ᠰᠢᠬᠦᠷᠯᠡᠨᠡ | | ᠶᠠᠪᠤᠬᠤᠢ᠂ ᠲᠠᠯᠠ ᠳᠤ ᠨᠣᠶᠠᠯᠠᠭᠰᠠᠨ ᠰᠠᠯᠬᠢ ᠰᠢᠯᠢ ᠲᠠᠭᠠᠭᠠᠳ | ᠢᠷᠡᠬᠦᠢ᠂ ᠲᠠᠰᠤᠷᠠᠬᠰᠠᠨ ᠶᠣᠩᠬᠤᠷ ᠢ ᠵᠠᠯᠭᠠᠵᠤ ᠬᠥᠭᠵᠢᠮ ᠡᠭᠡᠰᠢᠭᠯᠡᠭᠳᠡᠭᠡᠳ | ᠦᠷᠭᠦᠢ᠂ ᠥᠨᠥᠴᠢᠨ ᠪᠦᠷᠭᠦᠳ ᠤᠨ ᠡᠭᠦᠷ ᠢᠶᠠᠨ ᠰᠠᠬᠢᠭᠰᠠᠨ ᠬᠠᠳᠠ | ᠬᠢᠨᠠᠬᠤᠢ᠂ ᠶᠡᠭᠡ ᠤᠯᠠᠨ ᠡᠪᠦᠯ ᠬᠠᠪᠤᠷ ᠤᠨ ᠪᠠᠶᠢᠷᠢ ᠪᠤᠯᠢᠶᠠᠯᠳᠤᠭᠰᠠᠨ ᠪᠠᠭᠤᠷᠢ | | ᠵᠢᠷᠦᠬᠡ ᠲᠠᠬᠵᠢᠭᠤᠯᠤᠬᠰᠠᠨ ᠬᠦᠢᠲᠡᠨ ᠰᠠᠮ ᠰᠠᠮᠭᠡᠨ ᠠᠶᠠᠷᠯᠠᠭᠠᠳ | ᠵᠢᠩ ᠳᠠᠭᠠᠭᠠᠭᠰᠠᠨ ᠪᠤᠳᠤᠯ ᠴᠡᠴᠡᠭᠡᠰ ᠤᠨ ᠲᠠᠯᠪᠢ ᠳᠤ ᠡᠷᠬᠡᠯᠡᠨᠡ | ᠵᠢᠷᠭᠢᠨ ᠵᠢᠷᠭᠢᠬᠦ ᠰᠢᠪᠠᠭᠤᠳ ᠤᠨ ᠮᠢᠩᠭᠠᠨ ᠡᠭᠡᠰᠢᠭ ᠲᠤ ᠰᠣᠭᠲᠣᠭᠤᠷᠠᠵᠤ | ᠵᠡᠭᠦᠳᠦᠨ ᠤ ᠲᠦᠮᠡᠨ ᠬᠦᠰᠡᠯ ᠬᠠᠪᠤᠷ ᠤᠨ ᠬᠤᠷᠠ ᠪᠠᠷ ᠰᠠᠷᠪᠠᠶᠢᠨᠠ | | ᠲᠠᠯᠠ ᠶᠢᠨ ᠪᠠᠷᠠ ᠬᠥᠬᠡᠷᠡᠵᠦ ᠰᠢᠨᠡᠬᠡᠨ ᠲᠡᠷᠯᠢᠭ ᠢᠶᠠᠨ ᠬᠡᠲᠦᠷᠡᠨᠡ | ᠡᠬᠡ ᠪᠠᠶᠢᠭᠠᠯᠢ ᠳᠡᠭᠡᠷᠡ ᠨᠢ ᠪᠤᠮᠠᠨ ᠴᠡᠴᠡᠭᠡᠰ ᠢᠶᠠᠨ ᠬᠠᠳᠬᠤᠮᠠᠯᠯᠠᠨᠠ | ᠲᠠᠨᠠᠨ ᠴᠡᠩᠬᠡᠷ ᠢᠷᠭᠤᠢ ᠠᠲᠠᠷ ᠴᠢᠮᠡᠭᠯᠡᠨ ᠳᠣᠶ᠋ᠢᠯᠵᠠᠭᠠᠳ | ᠲᠤᠮᠤᠭ ᠤᠨ ᠮᠢᠩᠭᠠᠨ ᠬᠠᠭᠤᠳᠠᠰᠤ ᠶᠢ ᠳᠡᠯᠪᠡᠭᠡᠨ ᠳᠡᠭᠡᠷᠡ ᠨᠢ ᠤᠷᠠᠯᠠᠨᠠ | | ᠦᠯᠢᠭᠡᠷ ᠤᠨ ᠨᠢᠭᠡᠨ ᠰᠠᠯᠠᠭᠠ ᠰᠠᠯᠬᠢᠨ ᠤ ᠭᠡᠯᠠ ᠳᠡᠭᠡᠷᠡ ᠲᠡᠭᠦᠰᠦᠨᠡ | ᠤᠶᠠᠩᠭᠠ ᠶᠢᠨ ᠨᠢᠭᠡᠨ ᠱᠠᠳ ᠨᠠᠷᠠᠨ ᠤ ᠭᠡᠷᠡᠯ ᠢ ᠡᠰᠬᠡᠨᠡ | ᠲᠠᠭᠠᠷᠠᠬᠤ ᠪᠠ ᠬᠠᠯᠠᠭᠤᠳᠠᠬᠤ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠵᠦᠢ | ᠳᠡᠯᠭᠡᠷᠡᠬᠦ ᠪᠠ ᠵᠤᠯᠭᠠᠷᠠᠬᠤ ᠬᠥᠮᠥᠨ ᠨᠡᠶᠢᠭᠡᠮ ᠤᠨ ᠵᠢᠮᠡ - | | ᠴᠡᠴᠡᠭᠡᠰ ᠤᠨ ᠲᠠᠯᠪᠢ ᠳᠡᠭᠡᠷᠡ ᠬᠠᠪᠤᠷ ᠤᠨ ᠵᠡᠭᠦᠳᠦ ᠳᠡᠷᠡᠯᠡᠩᠬᠡᠨ | ᠴᠢᠩ ᠪᠠᠶᠢᠭᠠᠯᠢ ᠶᠢ ᠴᠢᠮᠡᠬᠦ ᠬᠥᠬᠡᠮᠳᠦᠭ ᠤᠨᠢᠶᠠᠷ ᠦᠶᠦᠭᠭᠡᠨ | ᠬᠦᠴᠦ ᠲᠠᠮᠢᠷ ᠢᠶᠠᠨ ᠰᠣᠶᠢᠬᠤ ᠬᠡᠮᠡᠨᠡ ᠤᠷᠤᠭᠰᠢ ᠪᠠᠨ ᠬᠠᠷᠠᠭᠠᠷᠠᠢ | ᠬᠥᠭᠵᠢᠵᠦ ᠳᠦᠷᠡᠯᠵᠡᠭᠰᠡᠨ ᠠᠶᠢᠰᠤᠢ ᠬᠠᠪᠤᠷ ᠤᠨ ᠴᠢᠮᠡᠭᠡ ᠶᠢ ᠁ | | | ᠵᠣᠬᠢᠶᠠᠭᠴᠢ᠄ ᠡ᠊·ᠤᠷᠲᠤᠨᠠᠰᠤᠲᠤ |