| ᠠᠶᠢᠯ ᠤᠨ ᠠᠬᠠ ᠴᠡᠭᠡᠵᠢ ᠪᠠᠨ ᠤᠷᠤᠭᠰᠢ ᠲᠦᠷᠢᠵᠦ ᠬᠥᠯ ᠢᠶᠠᠨ ᠴᠢᠷᠦᠭᠰᠡᠭᠡᠷ ᠠᠶᠢᠰᠤᠢ᠃ ᠭᠠᠷ ᠢᠶᠠᠨ ᠰᠠᠵᠢᠬᠤ ᠦᠭᠡᠢ ᠬᠠᠷᠢᠨ ᠠᠷᠤᠨᠰᠢ ᠪᠠᠨ | ᠳᠡᠷᠪᠡᠶᠢᠯᠭᠡᠵᠦ ᠶᠠᠪᠤᠳᠠᠭ ᠰᠣᠨᠢᠨ ᠬᠥᠮᠥᠨ᠃ | ︽ᠰᠠᠶᠢᠨ ᠤᠤ᠂ ᠲᠠ︕ ᠭᠡᠷ ᠳᠠᠶᠠᠭᠠᠷ ᠢᠶᠠᠨ ᠰᠠᠶᠢᠨ ᠪᠠᠶᠢᠵᠠᠭᠠᠨᠠ ᠤᠤ︖︾ ᠭᠡᠰᠡᠨ ᠳᠤ᠂ ︽ᠰᠠᠶᠢᠨ᠂ ᠰᠠᠶᠢᠨ ᠤᠤ︖︾ ᠭᠡᠳ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠳᠤ | ᠶᠠᠭᠠᠷᠠᠭᠰᠠᠨ ᠪᠤᠯᠤᠯᠳᠠᠢ ᠨᠢᠳᠦ ᠨᠢ ᠲᠣᠭᠲᠠᠵᠤ ᠶᠠᠳᠠᠨᠠ᠃ | ︽ᠬᠠᠮᠢᠭᠠ ᠣᠴᠢᠬᠤ ᠭᠡᠵᠦ ᠶᠠᠪᠤᠨᠠ︖︾ ᠭᠡᠰᠡᠨ ᠳᠤ᠂ ︽ᠪᠠᠯᠭᠠᠰᠤᠨ ᠳᠡᠭᠡᠷᠡ ᠡᠷᠦᠭᠡ ᠶᠢᠨ ᠴᠡᠷᠢᠭ ᠤᠨ ᠴᠤᠭᠯᠠᠭᠠᠨ ᠪᠤᠯᠬᠤ ᠭᠡᠳ ᠬᠥᠯ ᠭᠠᠵᠠᠷ ᠬᠦᠷᠬᠦ | ᠦᠭᠡᠢ ᠳᠡᠭᠳᠡᠵᠦ ᠶᠠᠪᠤᠨᠠ᠃ ᠠᠶᠢᠯ ᠤᠨ ᠠᠬᠠ ᠨᠢ ᠡᠷᠦᠭᠡ ᠶᠢᠨ ᠴᠡᠷᠢᠭ ᠤᠨ ᠪᠣᠯᠪᠠᠰᠤᠷᠠᠯ ᠳᠤ ᠳᠠᠪᠲᠠᠭᠳᠠᠵᠤ ᠶᠠᠪᠤᠭᠰᠠᠨ︾ ᠭᠡᠳ ᠮᠠᠶᠢᠵᠢᠭᠢᠨᠠᠪᠠ᠃ ᠬᠥᠯ ᠨᠢ | ᠬᠤᠮᠣᠶᠢᠵᠤ ᠲᠠᠮᠤᠯᠳᠤᠵᠤ ︵ᠨᠢᠭᠡ ᠬᠥᠯ ᠨᠢ ᠨᠦᠭᠦᠭᠡ ᠬᠥᠯ ᠳᠤ ᠲᠡᠭᠡᠭᠯᠡᠨ ᠣᠶᠢᠴᠢᠬᠤ︶ ᠤᠨᠠᠬᠤ ᠳᠤ ᠬᠤᠯᠠ ᠦᠭᠡᠢ ᠮᠠᠶᠢᠵᠢᠭᠢᠨᠠᠬᠤ ᠨᠢ ᠡᠮᠨᠢᠭ ᠲᠤᠬᠰᠢᠨ ᠤᠨᠤᠵᠤ᠂ | ᠠᠵᠢᠯ ᠤᠨ ᠬᠦᠨᠳᠦ ᠶᠢ ᠬᠢᠵᠦ ᠶᠠᠪᠤᠭᠰᠠᠨ ᠢᠶᠠᠨ ᠭᠡᠷᠡᠴᠢᠯᠡᠬᠦ ᠭᠡᠰᠡᠨ ᠮᠡᠲᠦ᠃ ᠨᠣᠭᠤᠭᠠᠨ ᠲᠠᠰᠠᠮᠠ ᠲᠠᠢ ᠴᠠᠭᠠᠨ ᠪᠤᠯᠢᠭᠠᠷᠢ ᠭᠤᠳᠤᠯ ᠨᠢ ᠤᠷᠤᠭ ᠬᠠᠯᠲᠠᠷ ᠪᠣᠯᠵᠠᠢ᠃ | ᠲᠣᠭᠤᠰᠣ ᠰᠢᠷᠣᠢ ᠳᠠᠭᠠᠭᠠᠬᠤ ᠪᠠᠷ ᠬᠠᠷᠠ ᠪᠠᠷᠠᠭᠠᠨ ᠥᠩᠭᠡᠲᠡᠢ ᠭᠤᠳᠤᠯ ᠡᠮᠦᠰᠦᠭᠰᠡᠨ ᠦᠭᠡᠢ ᠨᠢ ᠬᠠᠷᠢᠨ ᠵᠠᠯᠠᠭᠤ ᠽᠠᠨᠳᠠᠨ ᠶᠠᠪᠤᠭᠰᠠᠨ ᠢᠶᠠᠷ ᠢᠶᠠᠨ ᠪᠠᠭ᠋ᠠᠷᠬᠠᠬᠤ | ᠭᠡᠰᠡᠨ ᠶᠤᠮ ᠪᠢᠵᠡ᠃ | ᠡᠷᠦᠭᠡ ᠶᠢᠨ ᠴᠡᠷᠢᠭ ᠭᠡᠰᠡᠨ ᠨᠢ ᠮᠠᠨᠤᠰ ᠢ ᠪᠠᠭᠠ ᠳᠤ ᠬᠦᠴᠦ ᠳᠣᠷᠪᠢ ᠲᠠᠢ᠂ ᠵᠠᠯᠠᠭᠤ ᠢᠳᠡᠷᠴᠦᠳ ᠨᠢ ᠡᠷᠦᠭᠡ ᠶᠢᠨ ᠴᠡᠷᠢᠭ ᠲᠤ ᠲᠠᠲᠠᠭᠳᠠᠭᠠᠳ ᠬᠡᠦᠬᠡᠳ | ᠬᠥᠭᠰᠢᠳ ᠯᠡ ᠮᠠᠯ ᠤᠨ ᠵᠠᠬᠠ ᠳᠡᠭᠡᠷᠡ ᠬᠤᠴᠣᠷᠳᠠᠭ ᠪᠠᠶᠢᠯᠠ᠃ ᠠᠪᠤ ᠬᠡᠳᠦᠨ ᠲᠡᠭᠡᠭᠡᠪᠦᠷᠢ ᠶᠢᠨ ᠲᠡᠮᠡᠭᠡ ᠬᠥᠲᠥᠯᠥᠨ᠂ ᠤᠷᠳᠤ ᠠᠭᠤᠯᠠᠨ ᠠᠴᠠ ᠡᠪᠡᠰᠦᠨ ᠬᠦᠷᠢᠶᠡ | ᠲᠠᠲᠠᠬᠤ ᠮᠣᠳᠣ ᠪᠠᠭᠤᠯᠭᠠᠬᠤ ᠪᠠᠷ ᠶᠠᠪᠤᠭᠠᠳ ᠡᠵᠡᠭᠦᠢ᠃ | ᠮᠠᠨ ᠤ ᠬᠢ ᠬᠤᠨᠢ ᠤᠯᠠᠨ ᠲᠠᠢ᠃ ᠴᠠᠰᠤ ᠣᠷᠣᠵᠤ ᠲᠡᠭᠷᠢ ᠬᠦᠢᠲᠡᠷᠡᠨ ᠮᠠᠯ ᠢᠶᠠᠨ ᠬᠠᠰᠢᠶᠠᠯᠠᠵᠤ ᠡᠬᠢᠯᠡᠩᠭᠦᠲᠡ ᠬᠤᠷᠤᠭᠠ ᠬᠤᠲᠠᠨ ᠤ ᠰᠢᠭᠡᠭ ᠵᠤᠵᠠᠭᠠᠷᠠᠨ | ᠬᠤᠷᠢ ᠬᠤᠨᠣᠬᠤ ᠦᠭᠡᠢ ᠯᠠ ᠬᠥᠷᠵᠡᠩ ᠭᠢᠰᠬᠢᠬᠦ ᠠᠵᠢᠯ ᠭᠠᠷᠤᠨᠠ᠃ | ᠨᠢᠭᠡ ᠡᠳᠦᠷ ᠪᠠᠷᠪᠠᠶᠢᠭᠰᠠᠨ ᠬᠠᠷᠠ ᠰᠠᠬᠠᠯ ᠲᠠᠢ ᠲᠠᠭᠵᠢᠭᠠᠷ ᠵᠢᠵᠢᠭᠬᠡᠨ ᠪᠡᠶᠡ ᠲᠠᠢ ᠪᠠᠲᠤᠴᠠᠭᠠᠨ ᠭᠡᠭᠴᠢ ᠬᠥᠮᠥᠨ᠂ ᠠᠳᠤᠭᠤᠴᠢᠨ ᠠᠪᠠᠭᠠ ᠴᠢᠮᠡᠳ ᠤᠨ ᠬᠠᠮᠲᠤ | ᠬᠥᠷᠵᠡᠩ ᠭᠢᠰᠬᠢᠯᠴᠡᠬᠦ ᠪᠠᠷ ᠢᠷᠡᠯᠡ᠃ | ᠬᠤᠨᠢ ᠬᠤᠲᠠᠯᠠᠭᠤᠯᠵᠤ ᠶᠠᠪᠤᠩᠭᠠᠨ ᠪᠢ᠂ ᠠᠬᠠ ᠳᠤ᠄ ︽ᠳᠡᠷᠪᠡᠶᠢᠭᠡᠳ ᠶᠠᠪᠠᠭᠠᠨ ᠭᠠᠯᠠᠭᠤ ᠰᠢᠭ᠋ ᠶᠠᠮᠠᠷ ᠬᠠᠴᠢᠨ ᠠᠯᠬᠤᠳᠠᠭ ᠬᠥᠮᠥᠨ ᠪᠤᠢ︖︾ ᠭᠡᠰᠡᠨ ᠳᠤ᠂ | ︽ᠪᠠᠷᠪᠠᠶᠢᠭᠰᠠᠨ ᠬᠠᠷᠠ ᠰᠠᠬᠠᠯ ᠨᠢ ᠪᠠᠷᠢᠭᠤᠯ ᠵᠠᠭᠤᠴᠢᠬᠠᠭᠰᠠᠨ ᠶᠤᠮᠰᠢᠭ᠃ ᠶᠡᠷᠦ ᠨᠢ ᠡᠨᠡ ︿ᠪᠠᠷᠢᠭᠤᠯ ᠰᠠᠬᠠᠯᠲᠤ﹀ ᠴᠢᠨᠢ ᠲᠠᠬᠳᠠᠭᠠᠨᠠᠭᠠᠳ ᠬᠥᠷᠵᠡᠩ ᠳᠠᠭᠠᠭᠠᠳᠠᠭ | ᠶᠤᠮ ᠪᠣᠯ ᠤᠤ ᠳ᠋ᠠ︾ ᠭᠡᠵᠦ ᠪᠠᠶᠢᠨᠠ᠃ ᠪᠢ ᠲᠤᠰᠴᠤ ᠠᠪᠤᠭᠠᠳ ︽ᠶᠣᠰᠣᠲᠠᠢ ᠣᠨᠣᠭᠠᠭᠰᠠᠨ ᠨᠡᠷᠡ︾ ᠭᠡᠲᠡᠯᠡ ᠡᠵᠢ ᠬᠡᠵᠢᠶᠡᠨᠡᠢ ᠦᠭᠡᠢ ᠣᠯᠣᠭᠠᠳ ᠰᠣᠨᠣᠰᠴᠢᠬᠠᠵᠠᠢ᠃ | ︽ᠲᠡᠷᠡ ᠬᠥᠮᠥᠨ ᠤ ᠲᠠᠭᠳᠠᠭᠠᠷ ᠪᠡᠶᠡ᠂ ᠪᠠᠷᠪᠠᠭᠠᠷ ᠰᠠᠬᠠᠯ ᠨᠢ ᠲᠠ ᠨᠠᠷ ᠲᠤ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠶᠤᠮ︖ ᠬᠥᠮᠥᠨ ᠤ ᠲᠦᠷᠦᠭᠰᠡᠨ ᠲᠥᠷᠬᠦ ᠶᠢ ᠦᠯᠡᠵᠦ | ᠰᠡᠪᠯᠡᠬᠦ ᠳᠡᠭᠡᠨ ᠁ ᠵᠠᠳᠠᠷᠠᠭᠰᠠᠨ ᠠᠮᠠ ᠲᠠᠢ ᠲᠤᠷᠠᠰᠭ᠋ᠠ ᠨᠤᠭᠤᠳ︾ ᠭᠡᠵᠦ ᠵᠠᠩᠳᠤᠷᠪᠠ᠃ | ᠣᠷᠣᠢ ᠨᠢ ᠴᠢᠮᠡᠳ ᠠᠪᠠᠭᠠ ᠵᠡᠭᠦᠨ ᠭᠡᠷ ᠲᠤ ᠡᠮᠡᠭᠡ᠂ ᠡᠵᠢ ᠬᠤᠶᠠᠷ ᠲᠠᠢ ᠬᠠᠭᠤᠴᠢᠯᠠᠨ᠂ ᠥᠨᠥ ︽ᠪᠠᠷᠢᠭᠤᠯ ᠰᠠᠬᠠᠯᠲᠤ︾ ᠮᠠᠨ ᠤ ᠠᠬᠠ ᠳᠡᠭᠦᠦ | ᠭᠤᠷᠪᠠ ᠲᠠᠢ ᠪᠠᠷᠠᠭᠤᠨ ᠭᠡᠷ ᠲᠤ ᠱᠠᠭᠠ ᠬᠠᠮᠤᠯᠠ᠃ ᠣᠷᠣᠢ ᠣᠷᠣᠢ ᠱᠠᠭᠠ ᠬᠠᠮᠤᠳᠠᠭ ᠮᠠᠨ ᠤ ᠭᠤᠷᠪᠠ ᠱᠠᠭᠠ ᠬᠠᠮᠤᠬᠤ ᠳᠠᠭᠠᠨ ᠣᠪᠣᠭᠠ ᠯᠠ ᠳ᠋ᠠ᠃ ᠬᠠᠷᠢᠨ | ︽ᠪᠠᠷᠢᠭᠤᠯ ᠰᠠᠬᠠᠯᠲᠤ︾ ᠱᠠᠭᠠ ᠬᠠᠮᠤᠬᠤ ᠳᠠᠭᠠᠨ ᠲᠠᠭᠠᠷᠠᠤᠬᠠᠨ᠃ ᠬᠠᠷᠢᠭᠤ ᠦᠭᠡᠢ ᠰᠢᠭᠦᠭᠳᠡᠬᠦ ᠶᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ︽ᠵᠠ᠂ ᠵᠠ᠂ ᠶᠠᠷᠰᠢᠭ︕ ᠱᠠᠭᠠ ᠬᠠᠮᠤᠵᠤ | ᠲᠣᠭᠯᠠᠬᠤ ᠪᠠᠷ ᠶᠠᠮᠠᠷ ᠬᠡᠦᠬᠡᠳ ᠴᠦ ᠪᠢᠰᠢ᠃ ᠠᠶᠢᠯ ᠤᠨ ᠠᠪᠠᠭᠠ ᠨᠢ ᠲᠠ ᠨᠠᠷ ᠲᠤ ᠦᠯᠢᠭᠡᠷ ᠶᠠᠷᠢᠶᠠ︾ ᠭᠡᠯᠡ᠃ | ︽ᠠᠪᠠᠭᠠ ᠨᠢ ᠳᠠᠪᠬᠢᠵᠤ ᠶᠠᠪᠤᠭᠠ ᠮᠣᠷᠢᠨ ᠳᠡᠭᠡᠷᠡ ᠠᠴᠠ ᠲᠡᠷᠡᠰᠦ ᠪᠤᠷᠭᠠᠰᠤ ᠪᠠᠷ ᠪᠦᠲᠦᠭᠡᠭᠳᠡᠭᠰᠡᠨ ᠮᠠᠭᠤᠰᠠᠶᠢᠨ ᠫᠠᠢ ᠨᠤᠭᠤᠳ ᠤᠨ ᠭᠠᠯ ᠮᠠᠩᠨᠠᠢ ᠶᠢ ᠨᠢ | ᠭᠠᠯ ᠪᠤᠳᠠᠷᠠᠳᠠᠯᠠ ᠣᠨᠣᠭᠠᠳᠠᠭ ᠮᠡᠷᠭᠡᠨ ᠫᠤᠤᠴᠢ᠃ ᠮᠥᠯᠬᠦᠵᠦ ᠤᠷᠤᠭᠰᠢᠯᠠᠬᠤ ᠳᠠᠭᠠᠨ ᠪᠦᠷ ᠴᠦ ᠭᠠᠷᠮᠠᠭᠠᠢ᠃ ᠵᠡᠭᠦᠨ ᠰᠤᠭᠤᠨ ᠳᠠᠭᠠᠨ ᠫᠤᠤ ᠪᠠᠨ ᠰᠤᠭᠤᠪᠴᠢᠯᠠᠵᠤ᠂ | ᠪᠠᠷᠠᠭᠤᠨ ᠲᠣᠬᠤᠢ ᠪᠠᠷ ᠢᠶᠠᠨ ᠲᠣᠬᠤᠶᠢᠯᠳᠠᠨ ᠤᠷᠤᠭᠰᠢᠯᠠᠬᠤ ᠳᠤ ᠪᠤᠰᠤᠳ ᠡᠷᠦᠭᠡ ᠶᠢᠨ ᠴᠡᠷᠢᠭ ᠤᠳ ᠲᠡᠷᠲᠡᠭᠡ ᠲᠡᠨᠳᠡ ᠮᠢᠨᠤ ᠲᠣᠭᠤᠰᠣᠨ ᠳᠤ ᠪᠤᠯᠠᠬᠳᠠᠨ | ᠬᠤᠴᠣᠷᠳᠠᠭ᠃ ᠶᠡᠷᠦ ᠨᠢ ᠮᠠᠨ ᠤ ᠪᠠᠷᠢᠭᠠᠳᠠ ᠳᠤ ᠮᠢᠨᠤ ᠡᠮᠦᠨᠡ ᠭᠠᠷᠬᠤ ᠳᠣᠷᠪᠢᠲᠠᠢ ᠡᠷᠡ ᠪᠠᠶᠢᠭᠠ ᠦᠭᠡᠢ ᠶᠤᠮ︾ ᠭᠡᠰᠡᠨ ᠳᠤ᠂ ︽ᠢ᠂ ᠶᠠᠮᠠᠷ ᠴᠢᠳᠠᠯ ᠲᠠᠢ ᠶᠤᠮ︖︾ | ᠭᠡᠳ ᠳᠡᠭᠦᠦ ᠮᠢᠨᠢ ᠲᠠᠭᠤ ᠠᠯᠳᠠᠨᠠ᠃ | ︽ᠴᠢᠳᠠᠯ ᠲᠠᠢ ᠪᠠᠷ ᠵᠤᠬᠰᠤᠬᠤ ᠦᠭᠡᠢ ᠵᠣᠷᠢᠭ ᠲᠠᠢ᠃ ᠬᠠᠳᠠ ᠴᠢᠯᠠᠭᠤ᠂ ᠣᠷᠪᠣᠭ ᠪᠤᠳᠠ᠂ ᠴᠠᠰᠤ ᠮᠥᠰᠥᠨ ᠳᠡᠭᠡᠭᠦᠷ ᠵᠠᠮ ᠭᠤᠯᠣᠬᠤ ᠦᠭᠡᠢ ᠲᠠᠩᠺ ᠰᠢᠭ᠋ | ᠰᠢᠭᠤᠷᠬᠠᠢ ᠤᠷᠤᠭᠰᠢᠯᠠᠳᠠᠭ᠃ ᠳᠤᠯᠠᠭᠠᠨ ᠤ ᠴᠠᠭ ᠲᠤ ᠡᠪᠦᠳᠦᠭ᠂ ᠲᠣᠬᠤᠢ ᠬᠤᠶᠠᠷ ᠤᠯᠠᠭᠠᠨ ᠬᠠᠯᠴᠠᠭᠠᠢ ᠪᠣᠯᠣᠨᠠ᠃ ᠬᠠᠷᠢᠨ ᠬᠦᠢᠲᠡᠨ ᠤ ᠤᠯᠠᠷᠢᠯ ᠳᠤ ᠠᠷᠠᠰᠤᠨ | ᠬᠤᠪᠴᠠᠰᠤ᠂ ᠰᠢᠷᠢᠨ ᠭᠤᠳᠤᠯ ᠨᠡᠮᠡᠷᠢ ᠪᠤᠯᠬᠤ ᠨᠢ ᠴᠦ ᠪᠣᠯᠣᠨᠠ᠃ ᠠᠷᠠᠰᠤᠨ ᠬᠤᠪᠴᠠᠰᠤᠨ ᠤ ᠡᠩᠭᠡᠷ ᠲᠣᠬᠤᠢ᠂ ᠨᠡᠬᠡᠢ ᠥᠮᠥᠳᠦᠨ ᠤ ᠡᠪᠦᠳᠦᠭ ᠲᠠᠰᠢᠶᠠ᠂ ᠭᠤᠳᠤᠯ | ᠪᠠᠭᠠᠷᠲᠤᠭ ᠤᠨ ᠬᠠᠮᠠᠷ ᠬᠤᠩᠰᠢᠶᠠᠷ ᠢ ᠲᠡᠰᠬᠡᠨᠡ ᠭᠡᠵᠦ ᠦᠭᠡᠢ᠃ ᠦᠬᠡᠷ ᠤᠨ ᠰᠢᠷᠢ ᠪᠠᠷ ᠦᠳᠡᠭᠰᠡᠨ ᠴᠦ ᠬᠤᠶᠠᠷ ᠬᠤᠨᠣᠬᠤ ᠦᠭᠡᠢ ᠴᠤᠭᠤᠷᠠᠨᠠ᠃ ᠮᠡᠷᠭᠡᠵᠢᠯ ᠢᠶᠠᠨ | ᠲᠡᠭᠡᠭᠰᠢᠯᠡᠭᠦᠯᠵᠦ᠂ ᠬᠢᠯᠢ ᠬᠢᠵᠠᠭᠠᠷ ᠢᠶᠠᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠱᠠᠯᠳᠠᠩ ᠲᠣᠬᠤᠢ᠂ ᠨᠢᠴᠦᠭᠦᠨ ᠡᠪᠦᠳᠦᠭ ᠢᠶᠠᠷ ᠲᠡᠮᠡᠴᠡᠵᠦ ᠶᠠᠪᠤᠭᠰᠠᠨ ᠳ᠋ᠠ︾ ᠭᠡᠳ ᠬᠠᠨᠠ ᠶᠢᠨ | ᠲᠣᠯᠣᠭᠠᠢ ᠰᠢᠷᠳᠡᠨ ᠰᠠᠬᠠᠯ ᠢᠶᠠᠨ ᠰᠢᠪᠲᠤᠷᠠᠪᠠ᠃ ᠮᠠᠨᠤᠰ ᠢ ᠬᠡᠦᠬᠡᠳ ᠭᠡᠵᠦ ᠡᠯᠡᠭ ᠪᠠᠷᠢᠨ ᠬᠤᠳᠠᠯ ᠵᠠᠯᠠᠵᠤ ᠪᠠᠶᠢᠬᠤ ᠶᠢ ᠨᠢ ᠮᠡᠳᠡᠵᠦ ᠪᠠᠶᠢᠭᠰᠠᠨ ᠴᠦ ᠬᠥᠭᠲᠡᠢ | ᠶᠠᠷᠢᠶᠠᠨ ᠳᠤᠨᠢ ᠲᠠᠲᠠᠭᠳᠠᠨᠠ᠃ | ︽ᠪᠠᠰᠠ ᠨᠢᠭᠡ ᠦᠯᠢᠭᠡᠷ ᠶᠠᠷᠢᠭᠠᠴᠢ︕︾ ᠭᠡᠳ ᠤᠳᠬᠤᠨ ᠳᠡᠭᠦᠦ ᠮᠢᠨᠢ ᠱᠠᠯᠠᠯᠠ᠃ | ︽ᠵᠠ᠂ ᠲᠡᠭᠡᠶᠡ︕ ᠨᠢᠭᠡ ᠡᠳᠦᠷ ᠪᠢ ᠮᠠᠨᠳᠤᠬᠤ ᠲᠣᠯᠣᠭᠠᠢ ᠶᠢᠨ ᠣᠷᠣᠢ ᠳᠡᠭᠡᠷᠡ ᠠᠳᠤᠭᠤ ᠳᠤᠷᠠᠨᠳᠠᠵᠤ ᠰᠠᠭᠤᠲᠠᠯᠠ ᠲᠤᠷᠠᠨ ᠤ ᠬᠠᠷᠠᠭᠠᠨ ᠳᠤ ᠳᠠᠶᠢᠰᠤᠨ ᠤ | ᠬᠠᠷᠠ ᠨᠢᠰᠬᠡᠯ ᠣᠷᠣᠭᠠᠳ ᠢᠷᠡᠪᠡ᠃ ᠶᠠᠳᠠᠵᠤ ᠫᠤᠤ ᠪᠠᠨ ᠡᠭᠦᠷᠴᠦ ᠭᠠᠷᠤᠭᠰᠠᠨ ᠦᠭᠡᠢ᠃ ᠰᠠᠨᠳᠤᠷᠬᠤ ᠳᠠᠭᠠᠨ ᠭᠠᠭᠴᠠ ᠦᠰᠦᠷᠦᠨ ᠵᠢᠭᠦᠷ ᠠᠴᠠ ᠨᠢ ᠲᠠᠲᠠᠵᠤ | ᠤᠨᠠᠭᠠᠭᠰᠠᠨ ᠶᠤᠮ︾ ᠭᠡᠲᠡᠯᠡ ᠠᠬᠠ ᠫᠦᠰᠬᠢᠲᠡᠯᠡ ᠢᠨᠢᠶᠡᠭᠡᠳ᠄ ︽ᠳᠠᠶᠢᠰᠤᠨ ᠤ ᠨᠢᠰᠬᠡᠯ ᠢ ᠤᠤ︖︾ ᠭᠡᠰᠡᠨ ᠳᠤ᠂ ︽ᠵᠠ᠂ ᠵᠠ︕ ᠬᠤᠷᠠᠭᠠ ᠲᠠᠢ ᠬᠤᠨᠢᠨ ᠤ ᠳᠡᠭᠡᠭᠦᠷ | ᠬᠠᠷᠠ ᠰᠢᠪᠠᠭᠤ ᠡᠷᠭᠢᠯᠳᠦᠵᠦ ᠪᠠᠶᠢᠬᠤ ᠪᠠᠷ ᠨᠢ ᠰᠢᠭᠦᠷᠡᠭᠰᠡᠨ ᠶᠤᠮ︾ ᠭᠡᠯᠡ᠃ ︽ᠲᠡᠶᠢᠮᠦ ᠥᠨᠳᠥᠷ ᠳᠡᠭᠡᠷᠡ ᠠᠴᠠ ᠤᠤ︖︾ ᠭᠡᠳ ᠳᠡᠭᠦᠦ ᠮᠢᠨᠢ ᠭᠠᠶᠢᠬᠠᠭᠰᠠᠨ | ᠶᠠᠩᠵᠤ ᠲᠠᠢ ᠲᠣᠯᠣᠭᠠᠢ ᠪᠠᠨ ᠳᠠᠯᠵᠢᠢᠯᠭᠠᠪᠠ᠃ ︽ᠮᠥᠯᠬᠦᠭᠰᠡᠭᠡᠷ ᠪᠠᠶᠢᠭᠠᠳ ᠠᠪᠠᠭᠠ ᠶᠢᠨ ᠬᠢᠨᠢ ᠭᠠᠷ ᠰᠤᠨᠴᠢᠬᠠᠭᠰᠠᠨ ᠶᠤᠮ ᠯᠠ ᠳ᠋ᠠ᠃ ᠵᠠ᠂ ᠵᠠ᠂ ᠡᠷᠲᠡᠬᠡᠨ | ᠬᠠᠵᠠᠭᠤᠯᠠᠵᠤ ᠰᠡᠭᠦᠵᠢ ᠪᠠᠨ ᠠᠮᠠᠷᠠᠭᠠᠶᠠ︾ ᠭᠡᠳ ᠪᠣᠰᠪᠠ᠃ | ᠮᠠᠷᠭᠠᠰᠢ ᠨᠢ ᠬᠤᠷᠤᠭᠠ ᠭᠢᠰᠬᠢᠯᠡ᠃ ᠤᠭ ᠤᠨ ᠮᠠᠶ᠋ᠢᠭ ᠬᠥᠯ ᠲᠠᠢ ᠥᠨᠥ ︽ᠪᠠᠷᠢᠭᠤᠯ ᠰᠠᠬᠠᠯᠲᠤ︾ ᠲᠣᠮᠣ ᠳᠥᠷᠪᠡᠯᠵᠢᠨ ᠬᠥᠷᠵᠡᠩ ᠢ ᠳᠠᠭᠠᠭᠠᠵᠤ ᠶᠠᠳᠠᠭᠰᠠᠨ | ᠶᠠᠩᠵᠤ ᠲᠠᠢ ᠮᠠᠶᠢᠵᠢᠬᠴᠢᠨ ᠠᠯᠬᠤᠬᠤ ᠶᠢ ᠬᠠᠷᠠᠭᠰᠠᠨ ᠳᠡᠭᠦᠦ ᠮᠢᠨᠢ ︽ᠠᠶᠢᠯ ᠤᠨ ᠠᠪᠠᠭᠠ ᠠ᠋︕ ᠲᠠ ᠬᠥᠷᠵᠡᠩ ᠵᠥᠭᠡᠭᠡᠵᠦ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠬᠤ ᠶᠢᠨ ᠬᠡᠷᠡᠭ | ᠦᠭᠡᠢ ᠯᠠ ᠳ᠋ᠠ᠃ ᠰᠤᠨᠳᠠᠭ ᠭᠠᠷ ᠢᠶᠠᠷ ᠢᠶᠠᠨ ᠁︾ ᠭᠡᠲᠡᠯᠡ ︽ᠬᠦᠨᠳᠦ ᠬᠥᠷᠵᠡᠩ ᠭᠠᠭᠴᠠᠬᠠᠨ ᠲᠠᠯᠠ ᠠᠴᠠ ᠨᠢ ᠠᠳᠬᠤᠬᠤ ᠪᠠᠷ ᠪᠡᠶᠡ ᠪᠠᠨ ᠳᠠᠭᠠᠭᠠᠬᠤ ᠦᠭᠡᠢ | ᠵᠠᠮ ᠤᠨ ᠳᠤᠮᠳᠠ ᠬᠠᠭᠠᠷᠠᠴᠢᠬᠠᠨᠠ ᠯᠠ ᠳ᠋ᠠ᠃ ᠬᠠᠷᠢᠨ ᠠᠪᠠᠭᠠ ᠶᠢᠨ ᠬᠢᠨᠢ ᠭᠠᠷ ᠬᠦᠷᠵᠡ ᠰᠢᠭ ᠥᠷᠭᠡᠨ ᠪᠠᠶᠢᠭᠰᠠᠨ ᠪᠣᠯ ᠪᠤᠯᠬᠤ ᠯᠠ ᠶᠤᠮ︾ ᠭᠡᠵᠦ ᠪᠠᠶᠢᠨᠠ᠃ | ᠪᠢ ᠡᠮᠡᠭᠡ ᠠᠴᠠ ︽ᠡᠨᠡ ᠠᠶᠢᠯ ᠤᠨ ᠠᠪᠠᠭᠠ ᠵᠢᠭᠠᠬᠠᠨ ᠬᠥᠭᠡᠷᠦᠦ ᠶᠤᠮ ᠤᠤ ᠳ᠋ᠠ︖︾ ᠭᠡᠰᠡᠨ ᠳᠤ᠄ ︽ᠬᠥᠮᠥᠨ ᠤ ᠨᠢᠭᠡ ᠵᠠᠩ ᠯᠠ ᠪᠠᠶᠢᠭᠠ ᠪᠢᠵᠡ᠃ ᠬᠠᠷᠢᠨ | ︿ᠠᠶᠢᠯ ᠤᠨ ᠠᠪᠠᠭᠠ﹀ ᠭᠡᠬᠦ ᠪᠠᠨ ᠪᠤᠯᠢ︕ ᠠᠬᠠ ᠠᠴᠠ ᠴᠢᠨᠢ ᠬᠡᠳᠦᠬᠡᠨ ᠯᠠ ᠠᠬᠠ ᠶᠤᠮ᠃ ︿ᠠᠶᠢᠯ ᠤᠨ ᠠᠬᠠ﹀ ᠭᠡᠵᠦ ᠪᠠᠢ︾ ᠭᠡᠪᠡ᠃ ︽ᠪᠠᠷᠪᠠᠭᠠᠷ ᠬᠠᠷᠠ ᠰᠠᠬᠠᠯ ᠲᠠᠢ | ᠬᠥᠮᠥᠨ ᠢ ᠤᠤ︖︾ ᠭᠡᠰᠡᠨ ᠳᠤ᠂ ︽ᠬᠥᠮᠥᠨ ᠢ ᠰᠠᠬᠠᠯ ᠢᠶᠠᠷ ᠨᠢ ᠪᠢᠰᠢ ᠨᠠᠰᠤ ᠪᠠᠷ ᠨᠢ ᠬᠦᠨᠳᠦᠯᠡᠳᠡᠭ ᠶᠤᠮ᠃ ᠶᠡᠷᠦ ᠨᠢ ᠠᠪᠤ ᠡᠵᠢ ᠪᠠᠨ ᠠᠮᠢᠳᠤ ᠰᠡᠷᠡᠭᠦᠨ | ᠪᠠᠶᠢᠬᠤ ᠳᠤ ᠰᠠᠬᠠᠯ ᠲᠠᠯᠪᠢᠬᠤ ᠶᠢ ᠴᠡᠭᠡᠷᠯᠡᠳᠡᠭ︾ ᠭᠡᠯᠡ᠃ ︽ᠬᠥᠭᠡᠷᠦᠬᠦᠢ᠂ ᠲᠡᠭᠡᠪᠡᠯ ᠥᠨᠥᠴᠢᠨ ᠶᠤᠮ ᠪᠠᠶᠢᠨᠠ ᠰᠢᠳᠡ︾ ᠭᠡᠰᠡᠨ ᠳᠤ᠂ ︽ᠳᠤᠭᠤᠢ᠂ ᠶᠠᠭᠤ | ᠳᠣᠩᠭᠤᠰᠳᠠᠭ ᠵᠣᠯᠢᠭ ᠪᠤᠢ︕ ᠠᠪᠤ ᠡᠵᠢ ᠨᠢ ᠬᠤᠶᠠᠭᠤᠯᠠ ᠬᠤᠶᠠᠭᠤᠯᠠ ᠪᠠᠨ ᠡᠷᠡᠭᠦᠯ ᠰᠠᠷᠠᠭᠤᠯ ᠰᠠᠶᠢᠬᠠᠨ ᠯᠠ ᠶᠠᠪᠤᠭᠠ᠃ ᠶᠡᠬᠡᠴᠦᠦᠯ ᠨᠢ ᠰᠤᠷᠭᠠᠳᠠᠭ ᠦᠭᠡᠢ ᠶᠤᠮ | ᠤᠤ᠂ ᠬᠡᠯᠡᠭᠰᠡᠨ ᠢ ᠨᠢ ᠲᠣᠭᠤᠳᠠᠭ ᠦᠭᠡᠢ ᠶᠤᠮ ᠤᠤ᠂ ᠬᠡᠦᠬᠡᠳ ᠢᠶᠠᠷ ᠢᠶᠠᠨ ᠯᠠ ᠰᠠᠬᠠᠯ ᠰᠠᠷᠪᠠᠶᠢᠯᠭᠠᠭᠰᠠᠨ ᠬᠠᠷᠠᠭᠳᠠᠳᠠᠭ ᠶᠤᠮ︾ ᠭᠡᠵᠦ ᠠᠶᠠ ᠮᠠᠭᠤᠲᠠᠶᠢᠬᠠᠨ | ᠳᠤᠤᠭᠠᠷᠪᠠ᠃ | ᠲᠡᠷᠡ ᠨᠢᠭᠡᠨ ᠡᠪᠦᠯ ᠮᠠᠨ ᠤ ᠬᠢ ᠠᠶᠢᠯ ᠤᠨ ᠠᠬᠠ ᠲᠠᠢ ᠬᠠᠮᠲᠤ ᠡᠪᠦᠯᠵᠢᠵᠦ ᠪᠢᠯᠡ᠃ | ᠨᠢᠭᠡ ᠡᠳᠦᠷ ᠪᠢ ᠠᠶᠢᠯ ᠤᠨ ᠠᠬᠠ ᠶᠢᠨ ᠳᠤ ᠣᠷᠣᠭᠰᠠᠨ ᠴᠢᠨᠢ ᠬᠥᠪᠬᠡᠨ ᠲᠠᠭᠯᠠᠭᠠ ᠲᠠᠢ ᠠᠪᠳᠠᠷᠠ ᠠᠴᠠ ᠪᠠᠨ ᠶᠠᠭᠤ ᠨᠢᠭᠡ ᠶᠢ ᠠᠪᠬᠤ ᠭᠡᠳ ᠰᠠᠨᠳᠠᠯᠢ | ᠳᠡᠭᠡᠷᠡ ᠵᠣᠭᠰᠣᠨ ᠠᠪᠳᠠᠷᠠ ᠤᠷᠤᠭᠤ ᠪᠠᠨ ᠲᠣᠩᠭᠤᠶᠢᠵᠤ ᠬᠠᠷᠠᠭᠳᠠᠪᠠ᠃ ︽ᠲᠠ ᠠᠪᠳᠠᠷᠠ ᠶᠢᠨ ᠢᠶᠠᠨ ᠢᠷᠤᠭᠠᠷ ᠲᠤ ᠬᠦᠷᠬᠦ ᠦᠭᠡᠢ ᠪᠠᠶᠢᠭᠠ ᠶᠤᠮ ᠤᠤ︖︾ | ᠭᠡᠰᠡᠨ ᠳᠤ᠂ ︽ᠠᠪᠳᠠᠷᠠ ᠶᠢᠨ ᠢᠶᠠᠨ ᠢᠷᠤᠭᠠᠷ ᠲᠤ ᠬᠦᠷᠬᠦ ᠦᠭᠡᠢ ᠡᠷᠡ ᠬᠠᠮᠢᠭᠠ ᠪᠠᠶᠢᠭᠰᠠᠨ ᠶᠤᠮ᠂ ᠠᠯᠢ᠂ ᠳᠡᠭᠦᠦ ᠮᠢᠨᠢ︕ ᠭᠠᠯ ᠤᠨ ᠬᠠᠪᠴᠢᠭᠤᠷ ᠠᠪᠤᠭᠠᠳ ᠠᠯᠢ︾ | ᠭᠡᠯᠡ᠃ ︽ᠬᠠᠪᠴᠢᠭᠤᠷ ᠢᠶᠠᠷ ᠶᠠᠭᠠᠬᠢᠬᠤ ᠶᠤᠮ︖︾ ᠭᠡᠰᠡᠨ ᠳᠤ᠂ ︽ᠪᠣᠭᠤᠳᠠᠯ ᠲᠠᠢ ᠴᠦᠢᠳᠡᠩ ᠠᠪᠳᠠᠷᠠ ᠶᠢᠨ ᠢᠷᠤᠭᠠᠷ ᠲᠤ ᠣᠷᠣᠴᠢᠬᠠᠭᠠᠳ ᠁︾ ᠭᠡᠵᠦ | ᠪᠠᠶᠢᠨᠠ᠃ ︽ᠲᠠᠨ ᠤ ᠰᠤᠨᠳᠠᠭ ᠭᠠᠷ︖︾ ᠭᠡᠰᠡᠨ ᠳᠤ᠂ ︽ᠭᠠᠯ ᠤᠨ ᠡᠳ᠋ᠯᠡᠬᠦᠨ ᠢ ᠬᠠᠪᠴᠢᠭᠤᠷ ᠢᠶᠠᠷ ᠤᠷᠤᠯᠳᠤᠳᠠᠭ ᠶᠤᠮ᠃ ᠵᠠ᠂ ᠵᠠ᠂ ᠠᠬᠠ ᠨᠢ ᠭᠠᠷ ᠢᠶᠠᠨ | ᠰᠤᠩᠭᠠᠭᠠᠳ ᠠᠪᠴᠢᠬᠠᠶᠠ︾ ᠭᠡᠳ ᠲᠣᠩᠭᠤᠶᠢᠲᠠᠯᠠ ᠲᠣᠯᠣᠭᠠᠢ ᠨᠢ ᠲᠡᠶᠢᠯᠦᠨ ᠠᠪᠳᠠᠷᠠ ᠳᠤ ᠣᠶᠢᠴᠢᠪᠠ᠃ ᠴᠢᠷᠠᠢ ᠨᠢ ᠴᠢᠷᠠᠢ ᠪᠢᠰᠢ ᠪᠣᠯᠴᠢᠬᠠᠭᠰᠠᠨ ᠪᠣᠰᠴᠤ | ᠢᠷᠡᠭᠡᠳ᠄ ︽ᠵᠠ᠂ ᠳᠡᠭᠦᠦ ᠮᠢᠨᠢ᠂ ᠡᠨᠡ ᠤᠴᠢᠷ ᠢ ᠬᠡᠨ ᠳᠤ ᠴᠦ ᠪᠢᠲᠡᠭᠡᠢ ᠬᠡᠯᠡᠭᠡᠷᠡᠢ︾ ᠭᠡᠪᠡ᠃ ᠬᠤᠶᠠᠷ ᠬᠥᠯ ᠨᠢ ᠭᠤᠵᠤᠰᠭᠢᠭᠡᠳ ᠲᠠᠯᠳᠠᠷᠠᠬᠰᠠᠨ ᠬᠥᠭᠲᠡᠢ ᠳᠦᠷᠢ ᠨᠢ | ᠨᠢᠳᠦᠨ ᠳᠤ ᠦᠵᠡᠭᠳᠡᠭᠡᠳ ᠢᠨᠢᠶᠡᠳᠦ ᠪᠠᠨ ᠪᠠᠷᠢᠵᠤ ᠶᠠᠳᠠᠭᠰᠠᠨ ᠪᠢ ᠪᠤᠰᠢᠭᠤᠬᠠᠨ ᠭᠠᠷᠴᠤ᠂ ᠠᠭᠤᠰᠬᠢ ᠪᠠᠨ ᠠᠭᠤᠵᠢᠷᠠᠲᠠᠯᠠ ᠢᠨᠢᠶᠡᠵᠦ ᠪᠢᠯᠡ᠃ | ᠴᠠᠰᠤ ᠬᠠᠶᠢᠯᠤᠨ ᠭᠠᠵᠠᠷ ᠲᠠᠷᠯᠠᠨᠲᠤᠭᠰᠠᠨ ᠬᠠᠪᠤᠷ ᠤᠨ ᠨᠢᠭᠡᠨ ᠡᠳᠦᠷ ᠪᠢ ᠲᠦᠯᠡᠭᠡ ᠲᠡᠭᠦᠵᠦ ᠶᠠᠪᠤᠲᠠᠯᠠ ᠠᠶᠢᠯ ᠤᠨ ᠠᠬᠠ ᠰᠢᠷᠠ ᠲᠠᠶᠢᠯᠤᠭ ᠢᠶᠠᠨ | ᠬᠥᠲᠥᠯᠥᠨ ᠫᠤᠤ ᠪᠠᠨ ᠮᠥᠷᠥᠪᠴᠢᠯᠡᠨ ᠠᠶᠢᠰᠤᠢ᠃ ᠫᠤᠤ ᠪᠠᠨ ᠲᠡᠮᠡᠭᠡᠨ ᠤ ᠪᠠᠨ ᠪᠦᠭᠦᠨ ᠠᠴᠠ ᠡᠯᠭᠦᠳᠡᠭ ᠪᠣᠯᠣᠭᠠᠰᠠᠢ ᠭᠡᠵᠦ ᠪᠤᠳᠤᠨ ᠬᠦᠯᠢᠶᠡᠵᠦ ᠵᠣᠭᠰᠣᠪᠠ᠃ ᠴᠠᠭᠠᠨ | ᠨᠡᠬᠡᠢ ᠲᠡᠪᠡᠯ ᠤᠨ ᠬᠢᠨᠢ ᠲᠠᠯᠠ ᠡᠩᠭᠡᠷ ᠶᠠᠭᠤ ᠴᠦ ᠦᠭᠡᠢ ᠨᠣᠷᠴᠢᠬᠠᠵᠠᠢ᠃ ︽ᠲᠠᠨ ᠤ ᠲᠠᠯᠠ ᠡᠩᠭᠡᠷ ᠶᠠᠭᠠᠬᠢᠭᠠᠳ ᠨᠣᠷᠴᠢᠬᠠᠭᠰᠠᠨ ᠶᠤᠮ︖︾ ᠭᠡᠰᠡᠨ ᠳᠤ᠂ | ︽ᠪᠤᠲᠠᠨ ᠳᠤ ᠬᠢᠷᠤᠭᠰᠠᠨ ᠲᠠᠤᠯᠠᠢ ᠲᠠᠭᠠᠷᠠᠬᠤ ᠪᠠᠷ ᠨᠢ ᠪᠣᠰᠣᠭᠠᠳ ᠲᠠᠬᠰᠢᠴᠢᠬᠠᠬᠤ ᠠᠴᠠ ᠨᠢ ᠪᠣᠯᠭᠤᠮᠵᠢᠯᠠᠨ᠂ ᠬᠤᠯᠠ ᠠᠴᠠ ᠮᠥᠯᠬᠦᠵᠦ ᠣᠴᠢᠭᠠᠳ ᠣᠨᠢᠯᠠᠭᠰᠠᠨ | ᠶᠤᠮ︾ ᠭᠡᠵᠦ ᠪᠠᠶᠢᠨᠠ᠃ ᠦᠨᠡᠬᠡᠷ ᠰᠢᠷᠠ ᠲᠠᠶᠢᠯᠤᠭ ᠤᠨ ᠬᠢᠨᠢ ᠪᠦᠭᠦᠨ ᠠᠴᠠ ᠲᠠᠤᠯᠠᠢ ᠡᠯᠭᠦᠭᠡ ᠲᠠᠢ ᠬᠠᠷᠠᠭᠳᠠᠪᠠ᠃ ᠡᠷᠦᠭᠡ ᠶᠢᠨ ᠴᠡᠷᠢᠭ ᠳᠡᠭᠡᠷᠡ ᠰᠤᠷᠤᠬᠰᠠᠨ | ᠡᠷᠳᠡᠮ ᠢᠶᠠᠨ ᠬᠡᠷᠡᠭᠯᠡᠭᠰᠡᠨ ᠠᠵᠢ᠃ ︽ᠨᠡᠬᠡᠢ ᠲᠡᠪᠡᠯ ᠤᠨ ᠬᠢᠨᠢ ᠡᠩᠭᠡᠷ ᠶᠠᠭᠤ ᠴᠦ ᠦᠭᠡᠢ ᠬᠠᠳᠠᠭᠠᠳ ᠬᠤᠷᠴᠶᠢᠴᠢᠬᠠᠨᠠ ᠳ᠋ᠠ︾ ᠭᠡᠵᠦ ᠪᠤᠳᠤᠳᠠᠯᠠ᠄ ︽ᠵᠠ᠂ ᠵᠠ᠂ | ᠬᠠᠷᠢᠵᠤ ᠪᠣᠷᠣ ᠶᠢᠨ ᠱᠥᠯᠥ ᠣᠭᠤᠴᠢᠯᠠᠨ ᠳᠤᠯᠠᠭᠠᠴᠠᠶᠠ ᠪᠠᠶᠢᠵᠤ ᠁︾ ᠭᠡᠳ ᠪᠠᠶᠠᠷᠲᠠᠢ ᠨᠢ ᠠᠷᠭᠠ ᠦᠭᠡᠢ ᠴᠠᠭᠠᠰᠢᠯᠠᠪᠠ᠃ ᠲᠠᠤᠯᠠᠢ᠂ ᠫᠤᠤ ᠠᠴᠠ ᠨᠢ ᠠᠷᠠᠢ | ᠬᠥᠩᠭᠡᠨ ᠪᠠᠶᠢᠮᠠᠷ ᠶᠤᠮ᠃ ︽ᠬᠠᠩᠭᠠᠢ ᠳᠡᠯᠡᠬᠡᠢ ᠭᠠᠨᠵᠤᠭᠠ ᠳᠤᠰᠤᠲᠠᠯᠠ︕︾ ᠭᠡᠵᠦ ᠪᠡᠯᠭᠡᠰᠢᠶᠡᠭᠰᠡᠨ ᠶᠤᠮ ᠪᠢᠵᠡ ᠳ᠋ᠠ᠂ ᠬᠥᠭᠡᠷᠦᠬᠦᠢ︕ ᠪᠤᠲᠠᠨ ᠤ ᠪᠣᠷᠣ ᠲᠠᠤᠯᠠᠢ | ᠪᠢᠰᠢ ᠨᠠᠮᠤᠷ ᠤᠨ ᠲᠠᠷᠭᠤᠨ ᠣᠭᠤᠨᠣ ᠤᠨᠠᠭᠠᠭᠰᠠᠨ ᠶᠤᠮᠰᠢᠭ ᠬᠥᠭᠡᠷᠴᠦ ᠶᠠᠪᠤᠭᠠ ᠨᠢ ᠢᠨᠢᠶᠡᠳᠦᠮ ᠲᠠᠢ ᠴᠦ ᠶᠤᠮᠰᠢᠭ᠂ ᠦᠷᠦᠪᠲᠦᠯ ᠲᠠᠢ ᠴᠦ ᠶᠤᠮᠰᠢᠭ ᠰᠠᠨᠠᠭᠳᠠᠪᠠ᠃ | ᠵᠠᠯᠠᠭᠤ ᠽᠠᠨᠳᠠᠨ ᠨᠠᠰᠤᠨ ᠳᠠᠭᠠᠨ ᠡᠷᠦᠭᠡ ᠶᠢᠨ ᠴᠡᠷᠢᠭ ᠤᠨ ᠪᠠᠶᠢᠯᠳᠤᠭᠴᠢ ᠶᠢᠨ ᠬᠤᠪᠢ ᠪᠠᠷ ︽ᠲᠠᠶᠢᠨ ᠤ ᠪᠡᠯᠡᠳᠬᠡᠯ ᠤᠨ ᠭᠤᠤ ᠮᠠᠯᠲᠠᠬᠤ᠂ ᠬᠤᠷᠤᠭᠠ | ᠰᠠᠷᠠᠪᠴᠢ ᠪᠠᠷᠢᠬᠤ᠂ ᠬᠤᠳᠳᠤᠭ ᠤᠰᠤ ᠯᠠᠶᠢᠳᠠᠬᠤ᠂ ᠡᠪᠡᠰᠦ ᠬᠠᠳᠤᠯᠠᠩ ᠬᠤᠷᠢᠶᠠᠬᠤ᠂ ᠤᠰᠤᠨ ᠴᠦᠭᠦᠷᠦᠮ ᠪᠠᠶᠢᠭᠤᠯᠬᠤ᠂ ᠡᠪᠡᠰᠦᠨ ᠬᠦᠷᠢᠶᠡ ᠲᠣᠣᠷᠯᠠᠬᠤ᠂ ᠪᠣᠷᠳᠣᠭᠠᠨ | ᠰᠠᠭᠤᠷᠢᠨ ᠭᠠᠷᠭᠠᠬᠤ᠂ ᠨᠣᠭᠤᠭᠠᠨ ᠪᠣᠷᠳᠤᠭᠠ ᠳᠠᠷᠤᠰᠢᠭᠤᠯᠬᠤ ᠁︾ ᠭᠡᠳ ᠪᠢᠰᠢᠭᠦᠢ ᠠᠷᠪᠢᠨ ᠬᠠᠮᠲᠤ ᠶᠢᠨ ᠭᠦᠳᠡᠯᠮᠦᠷᠢ ᠳᠤ ᠪᠡᠶᠡ ᠬᠠᠶᠢᠷᠠ ᠦᠭᠡᠢ ᠵᠢᠳᠬᠦᠵᠦ | ᠶᠠᠪᠤᠭᠰᠠᠨ ᠨᠢ ᠶᠠᠭᠤ ᠶᠠᠭᠤᠨ ᠠᠴᠠ ᠴᠦ ᠦᠨᠡᠨ ᠶᠤᠮᠳᠠᠭ᠃ | ︽ᠬᠥᠮᠥᠨ ᠤ ᠨᠢᠭᠡ ᠵᠠᠩ ᠯᠠ ᠪᠢᠵᠡ︕︾ ᠭᠡᠵᠦ ᠡᠮᠡᠭᠡ ᠶᠢᠨ ᠬᠡᠯᠡᠳᠡᠭ ᠵᠥᠪ᠃ ᠶᠠᠷᠢᠶᠠᠨ ᠳᠠᠭᠠᠨ ᠬᠠᠯᠠᠮᠰᠢᠨ ᠵᠠᠷᠢᠮ ᠳᠠᠭᠠᠨ ᠬᠠᠮᠢᠶᠠ ᠬᠠᠷᠢᠶᠠ ᠦᠭᠡᠢ | ᠥᠰᠬᠡᠭᠡᠨ ᠳᠥᠰᠬᠡᠭᠡᠨ ᠲᠠᠢ ᠲᠡᠭᠡᠭᠦᠯᠳᠡᠭ ᠴᠦ ᠬᠡᠨ ᠨᠢᠭᠡᠨ ᠳᠤ ᠬᠤᠣᠷ ᠬᠦᠷᠭᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠥᠷᠥᠭᠡᠯ ᠪᠤᠰᠤᠳ ᠢ ᠢᠨᠢᠶᠡᠯᠭᠡᠵᠦ ᠪᠠᠶᠠᠰᠬᠠᠵᠤ | ᠶᠠᠪᠤᠭᠰᠠᠨ ᠤ ᠪᠠᠨ ᠠᠴᠢ ᠪᠠᠷ ᠦᠷᠡ ᠬᠡᠦᠬᠡᠳ ᠤᠨ ᠢᠶᠠᠨ ᠰᠠᠶᠢᠨ ᠢ ᠦᠵᠡᠵᠦ᠂ ᠠᠵᠠ ᠵᠢᠷᠭᠠᠯ ᠲᠠᠢ ᠦᠳᠡᠯᠦᠭᠡ ᠨᠠᠰᠤ ᠪᠠᠨ ᠡᠯᠡᠭᠡᠵᠦ ᠶᠠᠪᠤᠭᠠ ᠪᠤᠶᠠᠨᠲᠠᠨ ᠤ ᠨᠢᠭᠡ᠂ | ᠠᠶᠢᠯ ᠤᠨ ᠠᠬᠠ ᠮᠢᠨᠢ᠃ | ᠡᠷᠦᠭᠡ ᠶᠢᠨ ᠴᠡᠷᠢᠭ ᠤᠨ ᠬᠢᠨᠢ ᠴᠤᠭᠯᠠᠭᠠᠨ ᠥᠯᠵᠡᠢ ᠬᠡᠶᠢᠮᠣᠷᠢ ᠲᠠᠢ ᠪᠤᠯᠬᠤ ᠪᠣᠯᠲᠤᠭᠠᠢ︕ |